Pensjónsaldurin í Danmark hækkar upp í 68 ár

Danir, sum eru undir 52 ár, skulu rokna við at vera 68 ár, áðrenn teir fáa eftirløn. Stjórnin umhugsar at hækka pensjónsaldurin upp í 68 ár.

Í 2006 gjørdu politisku flokkarnir eina semju um, at pensjónsaldurin skal stigvíst hækka úr 65 upp í 67 ár, frá 2022 til 2030.

Longu nú verður staðfest, at síðani avtalan varð gjørd í 2006, er livialdurin hækkaður nakað aftrat, og tí verður longu nú tosað um at hækka pensjónsaldurin upp í 68 ár.

Tí fer stjórnin at virka fyri at pensjónsaldurin verður hækkaður upp í 68 ár frá 2030.

Vinstri tekur undir

Og líkt er til, at stjórnin fær undirtøku fyri uppskotinum, tí Vinstri sigur seg taka undir við ætlanini.

Danska Fíggjarmálaráðið almannakunngjørdi tøl í vár, sum vístu, at 50 milliardir kr. fara at resta í á fíggjarlógini, um einki verður gjørt.

Tí verður mælt til at halda seg til semjuna frá 2006. Annars verður neyðugt at hækka skattirnar ella skerja vælferðina.