Cameron: Nýggj búskaparkreppa hóttir

Heimurin kann vera á veg ímóti eini búskaparkreppu.

Tað er niðurstøðan hjá bretska forsætisráðharranum, David Cameron, eftir G20-toppfundin, sum var í Avstralia um vikuskiftið.

Hann metir, at kreppan, sum er á veg, kann gerast líka ring sum tann, ið hevur niðurbundið Evropa seinastu seks árini.

Í eini grein í The Guardian í dag skrivar David Cameron, at gongdin í Bretlandi í løtuni er tekin um afturstig og ótryggleika, og tað kann vera til bága fyri bretska búskapin.

At stígur er í búskapinum í evrulondunum ávirkar bretar, og minkar um bretska útflutningin.

- Í evrulondunum eru tekin um afturstig við øktum arbeiðsloysi, minkandi vøkstri og fallandi prísum, skrivar Cameron.

Ávaringin frá bretska forsætisráðharranum kemur fáar dagar eftir, at stjórnin í bretska tjóðbankanum, Mark Carney, boðaði frá, at afturstig hótta alt Evropa.