Ferðavinnan skal bjarga grønlendska búskapinum

Ferðavinnan skal vera við til at bjarga grønlendska búskapinum. Tað tykjast fleiri politikarar at verða samdir um upp undir landstingsvalið, sum verður í næstu viku.

Ein uppgerð vísir, at árliga vitja 60.000 ferðafólk í Grønlandi, og tveir triðingar av teimum eru danir. Ætlanin er at fáa talið tvífaldað, so meira fæst burturúr.

Uppgerðin vísir eisini, at tey vitjandi leggja 334 milliónir kr. eftir seg í Grønlandi um árið, og tað ætla politikararnir at tvífalda.

Inntøkurnar svíkja

Grønland hevur stóran tørv á fleiri inntøkum, tí búskapurin er á skeivari leið, tí inntøkurnar svíkja. Danmarks Radio skrivar, at hallið á grønlendsku fíggjarlógini er umleið eina milliard kr.

Tá val var seinast í Grønlandi, var námsídnaðurin frammarlaga í valstríðnum, og stórar ætlanir vóru fyri framman.

Tær ætlaninar hava víst seg at taka nógv longri tíð enn mett, og tí er tað serliga ferðavinnan, sum setur dám á grønlendska landstingsvalið hesaferð.