Fakfeløg: Varðveitið farloyvisskipanina í ALS

Feløgini í Samtaki og Starvsmannafelagið mæla til at varðveita farloyvisskipanina í ALS.

Sambært uppskotinum Johan Dahl, landsstýrismanni, um at broyta lógina um ALS, skal farloyvisskipanin takast av. 

Samtak og Starvsmannafelagið, sum hava havt uppskotið til hoyringar, siga, at skipanin hevur riggað væl, og eigur at verða varðveitt.

Samtak sigur, at skipanin ger, at fólk, sum ikki eru á arbeiðsmarknaðinum, kunnu fáa starvsroyndir. Starvsvenjingin er ein lopfjøl, sum fleiri hava fingið gagn av. 

Skipanin er fíggjarliga neutral - tað er, at hon kostar einki - og tí er ikki neyðugt at taka hana av, uttan so at ein betri skipan verður sett í gildi, siga feløgini í Samtaki.

Gagnlig skipan

Starvsmannafelagið sigur, at farloyvisskipanin hevur verið gagnlig, og hevur tænt sínum endamáli. Hóast hon ikki verður brúkt so nógv í løtuni, er ikki rætt at taka hana av. Heldur eigur skipanin møguliga at verða endurskoðað og lagað til, sigur Starvsmannafelagið.

Føroya Arbeiðsgevarafelag hevur ongar viðmerkingar til uppskotið, sum í løtuni er til viðgerðar í vinnnevndini. 

Týsdagin eru Vinnuhúsið, fakfeløg, ALS-stýrið og Johan Dahl, landsstýrismaður, biðin um at koma á fund at siga sína hugsan um málið fyri nevndini.