Óbroytt fiskiveiðiavtala við íslendingar

Føroysk skip sleppa at fiska somu nøgdir í íslendskum sjógvi næsta ár sum í ár.

Jacob Vestergaard, landsstýrismaður í fiskivinnumálum, og íslendski starvsbróðir hansara, Sigurður Ingi Jóhannsson, skrivaðu í gjár undir sínámillum fiskiveiðuavtalu fyri næsta ár.

Føroyska botnfiskakvotan undir Íslandi verður framhaldandi 5.600 tons tilsamans, harav toskakvotan verður 1.375 tons og brosmukvotan 750 tons.

Føroyska lodnukvotan fyri vertíðina 2014/2015 verður 30.000 tons, um heildarkvotan verður 500.000 tons ella meir. Verður heildarkvotan minni enn 500.000 tons, verður føroyska kvotan 5% av heildarkvotuni. Føroysk skip kunnu virka 2/3 av kvotuni til matna, men eftir 15. februar avmarkað til 1/3. Er kvotan undir 500.000 tons, kunnu ¾ tilsamans virkast til matna, men tó ikki meir enn 1/3 eftir 15. februar. 

Íslendska makrelkvotan í føroyskum sjógvi í 2015 verður framhaldandi 1.300 tons, og kvotan av aðrari sild enn norðhavssild verður eisini óbroytt, 2.000 tons. 

Semja var um at halda fram við skipanunum um, at skipini fáa atgongd at fiska norðhavssild og svartkjaft hvør hjá øðrum. Íslendsk skip kunnu fiska sínar kvotur í føroyskum sjógvi og føroysk skip sínar kvotur í íslendskum sjógvi.

Skrivað varð undir fiskiveiðiavtaluna millum Føroyar og Ísland  í Reykjavík í gjár.