Sálarligt arbeiðsumhvørvi krevur meiri fólk

Arbeiðseftirlitið má hava tvey starvsfólk afturat, skal tað eisini hava eftirlit við sálarliga arbeiðsumhvørvinum á arbeiðsplássunum í Føroyum.

Brúk verður fyri einum sálarfrøðingi og einum eftirlitsfólki, sigur Arbeiðseftirlitið í svari til Vinnumálaráðið.

Vinnumálaráðið bað Arbeiðseftirlitið gera eitt fullfíggjað upprit um, hvørja uppgávur Arbeiðseftirlitið eigur at røkja, hvussu Arbeiðseftirlitið eigur at mennast, hvørjum kørmum tørvur er á, hvussu arbeiðsumhvørvisøkið eigur at raðfestast, og hvørji yvirskipað mál eiga at setast fyri økið. 

Uppritið skal vera liðugt nú í november. Millum annað varð Arbeiðseftirlitið spurt, hvussu eftirlitið við sálarliga arbeiðsumhvørvinum kann mennast. 

Ein millión afturat

Meira krevst enn tvey starvsfólk afturat fyri at hava munagott eftirlit við sálarliga arbeiðsumhvørvinum.

Arbeiðseftirlitið skal góðkenna privatar arbeiðsumhvørvisráðgevar, sum myndugleikin kann áleggja arbeiðsgevarum at brúka.

Eftirlitsfólkini hjá Arbeiðseftirlitinum mugu førleikamennast til endamálið, og vegleiðingar og leiðbeiningar mugu gerast. 

Men hetta krevur, at Arbeiðseftirlitið fær eina millión krónur afturat teimum 410.000 krónunum, sum játtanin er hækkað í fíggjarlógaruppskotinum fyri 2015.