Framsókn vil herða tilbúgvingarlógina

Føroyar eiga eisini at hava eina tilbúgving móti skipaðum brotsverkum, yvirgangi og kríggi fyri at verja talgildar upplýsingar.

Tilbúgvingarlógin nevnir skaðahendingar og vanlukkur, men tað er ikki nóg mikið, heldur Framsókn, sum hevur lagt fram uppskot um at broyta tilbúgvingarlógina.

Framsókn vísir á, at virkisførið í føroyska samfelagnum er meira og meira treytað av talgildari kunningartøkni og samskifti á netinum. 

Í talgilda undirstøðukervinum eru upplýsingar um eitt nú P-tal og onnur persónlig viðurskifti, sum eru avgerandi fyri, at stovnar og fyritøkur fáa framt sínar grundleggjandi uppgávur. 

Tí er neyðugt at verja hesar upplýsingar móti yvirgangi, brotsverkum og avleiðingum av kríggi, heldur Framsókn, sum vil hava tilbúgvingarlógina frá 2012 broytta.

Víðka Tilbúgvingarráðið

Flokkurin skjýtur eisini upp at víðka Tilbúgvingarráðið við einum fólki, sum hevur skil fyri samskiftis- og upplýsingatrygd.  
  
Og Framsókn vil hava í lógina, at upplýsingar, sum hava týdning fyri samfelagið, skulu goymast og viðgerast í Føroyum.

Lógarbroytingarnar skulu koma í gildi dagin eftir, at tær eru lýstar, tað er, um løgtingið samtykkir tær. 

Men stovnar, kommunur og fyritøkur eiga at fáa stundir til 1.januar 2017 at lúka nýggju krøvini í lógini.