Vit missa rækjur - grønlendingar missa fiskidagar

Føroyska royndarkvotan eftir 100 tonsum av rækjum við Grønland dettur burtur næsta ár.  Og 60 fiskidagar, sum Grønland eigur undir Føroyum, detta eisini burtur.

Føroyar og Grønland hava í dag skrivað undir avtalu í Keypmannahavn um sínámillum fiskiveiðirættindi í 2015. 

Avtalan er lítið broytt frá 2014, men nøkur ótroytt rættindi eru tikin úr avtaluni.

Føroysk skip sleppa at fiska 355 tons av toski við Eysturgrønland. Og føroysku svart-kalvakvoturnar við Eysturgrønland og Vesturgrønland verða ávikavist 275 og 100 tons.

Grønlendsk skip sleppa at fiska 2.100 tons av sild í føroyskum sjógvi og 5.500 tons av svartkjafti, sum Grønland hevur fingið gjøgnum NEAFC.