Álitið til fíggjarlóg verður lagt fram í morgin

Fíggjarnevndin verður liðug at skriva álit til fíggjarlógaruppskotið fyri 2015 í dag, og álitið verður lagt fram í morgin.

Tað upplýsir Bárður Nielsen, formaður í fíggjarnevndini.

Tí kann væntast, at fíggjarlógin kemur til aðru viðgerð seinni í vikuni.

Hallið í uppskotinum hjá Jørgeni Niclasen, landsstýrismanni, er 140 milliónir kr., men í 2016 væntar landsstýrið at hava 5,3 milliónir í avlopi. Og í 2017 verður avlopið 79 milliónir kr., væntar landsstýrið.

Nýggjar inntøkumetingar

Nýggjastu inntøkumetingarnar, sum fíggjarnevndin hevur fingið frá Fíggjarmálaráðnum, vísa, at landsskatturin verður sjey milliónir størri enn mett í september. Partafelagsskatturin verður níggju milliónir størri, og kapitalvinningsskatturin verður mettur at geva 19 milliónir meiri. 

Fíggjarmálaráðið væntar at fáa átta milliónir meiri í meirvirðisgjaldi enn mett í september. Hinvegin verður avgjaldið á makreli og sild 11 milliónir minni enn mett, og nú fleiri oljufeløg hava latið síni loyvi innaftur, minkar inntøkan frá víddargjaldi 30 milliónir kr. 

Sambært hesum eru tilsamans tvær milliónir krónur á muni millum inntøkumetingina nú og í september

Uppskotið um fíggjarlóg skal verða avgreitt fyri nýggjár. Vanliga plagar tingið at avgreiða fíggjarlógina, áðrenn farið verður í jólafrí.