Arbeiða við at endurskoða fólkaskúlalógina

Samgonguflokkarnir í mentanarnevndini taka ikki undir við uppskotinum hjá Tjóðveldi til samtyktar um at endurskoða fólkaskúlalógina.

Bjørn Kalsø, landsstýrismaður, hevur upplýst fyri nevndini, at Mentamálaráðið arbeiðir við at endurskoða fleiri viðurskifti í skúlanum. Tvey álit eru fyri stuttum latin landsstýrismanninum, sum kunnu vera grundarlag undir politiskari viðgerð av fólkaskúlanum. Av tí at Mentamálaráðið longu arbeiðir við málinum, mælir meirilutin í mentanarnevndini frá at samtykkja uppskotið.

Minnilutin, Javnaðarflokkurin, Framsókn og Tjóðveldi, mælir til at samtykkja uppskotið. 

Ov smalur og bókligur

Minnilutin sigur, at millum skúlafólk tykist semja vera um, at neyðugt er at endurskoða fólkaskúlalógina, og hoyringarpartar hava víst á, at hann er ov smalur og bókligur. Fólkaskúlin er ein skiljimaskina, har 4-5 næmingar í meðal í hvørjum flokki fáa lítið og einki burturur skúlagongdini. 

Tørvur er á einum breiðum skúla, sum í nógv størri mun stimbrar tey handaligu og kreativu evnini, sigur minnilutin í sínum áliti.