Biðja um 950.000 kr. til Smyril

Nú klokkan 10 fór Fíggjarnevndin á fund at umrøða eitt fíggjarnevndarskjal, sum skal hækka játtanina til Strandferðsluna við 950.000 kr., sum skulu nýtast til Smyril.

Í umbønini frá Strandferðsluni til Vinnumálaráðið, verður sagt, at neyðugt er við 950.000 kr. til óvæntaðar útreiðslur umborð á Smyrli.

Neyðugt hevur verið at fáa eitt fólk frá motorverksmiðjuni MAN at koma til Føroya at kanna høvuðsmotor 4 á Smyrli, tí hann í longri tíð hevur havt ymsar trupulleikar.

Haraftrat er neyðugt at skifta turboløðararnar á tveimum av hjálpimotorunum. Motorarnir verða ikki gjørdir longur, men tað hevur eydnast Strandferðsluni at fáa fatur á tveimum nýggjum løðarum.

At kanna høvuðsmotor 4 á Smyrli fer at kosta 500.000 kr., og teir báðir løðararnir, sum skulu keypast, kosta 450.000 kr.. Samlaða umbønin til Fíggjarnevndin er tí tilsamans 950.000 kr.