Bót fyri at blaka fisk út

Týsdagin meldaði norska fiskiveiðieftirlitið Akraberg til politiið fyri at blaka fisk fyri borð, skrivar Fiskaren.

Tá eftirlitsfólk av vaktarskipinum Nordkapp fóru umborð á Akraberg, varnaðust teir, at fiskur fór út í øðrum borðinum, og útblakingin helt fram, eftir at teir vóru komnir niður í verksmiðjuna.

Akraberg royndi á Thor Iversen bankanum, okkurt um 160 fjórðingar norðan fyri Vardø, upplýsir Håkon Engevik, skipari á Nordkapp, fyri Fiskaren.

Sambært Fiskaren góðtók reiðaríið hjá Akrabergi konfiskasjón fyri 450.000 norskar krónur, slakar 380.000 danskar, og skiparin fekk 30.000 kr. í bót, 25.000 danskar. 

Bankatrygd er veitt fyri pengunum, og Akraberg sleppur at halda fram við fiskiskapinum í norskum sjógvi.