Depilin til børn og ung við fjølbreki liðugur

Nýggi depilin til børn og ung við fjølbreki í Eysturoy er nú liðugur og klárur at taka í nýtslu. Hann kemur í staðin fyri dagstovnin Reiðrið í Saltnesi.

Á deplinum fáa 12 børn og ung við fjølbreki eitt dagtilboð, og harumframt eru átta umlættingarpláss til børn og ung úr øllum landinum. 

Almannamálaráðið hevur latið depilin byggja, og Landsverk hevur verið byggiharri.

Spakin varð settur í í januar 2013, og gongd kom á byggingina miðskeiðis í 2013.

Depilin varð upprunaliga mettur at kosta góðar 24 milliónir kr., men fíggjarkarmurin varð hækkaður upp í 26,5 milliónir kr. 

Nýggi depilin til børn og ung við fjølbreki heldur til á Gerðisvegi 5 í Runavík. Almenn móttøka verður á stovninum týsdagin 16. desember frá klokkan 15 til 17.