Ikki heimild at fiska makrel hjá línuskipum

Eingin heimild var at lata ídnaðarskip fiska makrelin hjá línuskipunum í 2012.

Álvarslig brek eru í málsviðgerðini hjá Fiskimálaráðnum.

Tí er álitið hjá Løgtingsins umboðsmanni sent formansskapinum í løgtinginum, løgmanni og landsstýrismanninum.

Tað sigur Løgtingsins umboðsmaður í svarinum til feðgarnar Høgna Mohr og Trónd Høgnason, sum kærdu avgerðina hjá Fiskimálaráðnum um ikki at geva teimum loyvi at fiska 200 tons av makreli í 2012 í samstarvi við onnur.

Fiskimálaráðið fær eisini álvarsliga átalu fyri handfaringina og viðgerðina av málinum.

Høgni Mohr og Tróndur Høgnason vístu á, at línuskip fingu makrelkvotu, sum tey sluppu undan at fiska sjálvi. 

Løgtingsins umboðsmaður sigur, at landsstýrismaðurin í fiskivinnumálum hevði ikki heimild til at flyta veiðiloyvini frá línuskipunum til ídnaðarskip, so ídnaðarskipini kundu fiska makrelin hjá línuskipunum.