Dettifoss misti 20 bingjur

Íslendska farmaskipið Dettifoss misti 20 bingjur í havið norðan fyri Føroyar seinnapartin í gjár.

Sjóbjargingarstøðin, MRCC, ávarar skip og bátar á leiðini um mistu bingjurnar. 

Bingjurnar fóru í havið, tá Dettifoss var á veg úr Føroyum til Íslands. Vakthavandi á MRCC-støðini sigur, at veðrið var ringt á leiðini.

Onkuntíð missa farmaskip bingjur í havið í illveðri, men tað er sjáldsamt at so nógvar bingjur fara fyri borð, sigur vakthavandi á MRCC-støðini.

Bingjurnar vóru fult lastaðar. Tað er ikki greitt, um bingjurnar eru farnar til botns. Tað veldst um, hvussu tær eru lastaðar, sigur vakthavandi á MRCC.

Dettifoss misti bingjurnar á knattstøðuni 63.01.4 norður og 009.52,5 vestur.