Hava gjørt fráfaringaravtalu við prest

Starvið sum prestur í Klaksvík verður lýst leyst í næstum, nú ein fráfaringaravtala er gjørd við Magnus Brahé Jørgensen. 

Tað sigur Jógvan Fríðriksson, biskupur.

Kirkjan søkti annars eftir einum vikari fyri Magnus Brahé Jørgensen, sum skuldi røkja starvið frá januar til august næsta ár.

Men nú tað hevur eydnast at fáa semju um eina fráfaringaravtalu, verður starvið helst lýst leyst, sigur Jógvan Fríðriksson, sum tó ikki fer at taka endaliga støðu til málið fyrr enn eftir jól.

Magnus Brahé Jørgensen hevur ikki arbeitt síðani í juni, eftir at ósemja tók seg upp um viðurskiftini hjá honum í mai.

Rúsdrekka og bústaðarviðurskifti

Tá boðsendi biskupur Magnus Brahé Jørgensen á fund um ymisk viðurskifti, m.a. rúsdrekka, bústaðaðarviðurskifti og tænastubýti.

Magnus Brahé Jørgensen vísti tá øllum aftur í samrøðu við tíðindaportalin in.fo.

Fráfaringaravtalan ber í sær, at Magnus Brahé Jørgensen fær løn í eitt ár og tíggju mánaðir. Haraftrat stendur honum í boði at fáa ymisk skeið 2015 og 2016. 

Verður starvið lýst leyst, verður nýggjur prestur helst settur um  hálvan februar í 2015, sigur Jógvan Fríðriksson, biskupur.

Magnus Brahé Jørgensen hevur onga viðmerking til málið í dag, men vísir til biskup.