450 flóttar útfyri italsku strondini

Italski herflotin royndi í nátt at koma umborð á eitt farmaskip við 450 flóttafólkum umborð, sum rekur ímóti italsku strindini. Manningin er rýmd av skipinum og motorurin er slóknaður.

73 metrar langa skipið, Ezadeen, er skrásett í Sierra Leone, tað er næstan 50 ára gamalt og varð á veg av Kypros til franska havnabýin, Sete.
Eitt av flóttafólkunum umborð fekk samband við italsku sjóverjuna, og greiddi frá, at manningin var farin av skipinum.
Italska verjan hevur biðið íslendska sjóverjuskipið, Týr, um hjálp. Týr er í økinum, tí skipið er partur av Frontex-ætlanini hjá ES, sum er um at verja ytstu markini í samveldinum.
Tríggir læknar eru umborð á Tyr, og ætlanin er, at teir við tyrlu skulu flytast umborð á farmaskipið.
Mánadagin fór italska sjóverjan umborð á eitt annað farmaskip, har 700 flóttafólk úr Sýria vóru umborð.
Manningin var eisini farin av tí skipinum, sum sigldi við sjálvstýrara. Tað skipið er skrásett í Moldova.
Skipið var bara fýra fjórðingar úr landi, tá tað eydnaðist italsku sjóverjuni at steðga tí.
Yvir 170.000 fólk royndu í fjør at koma úr Miðeystri og Norðurafrika til Italia. Helvtin er úr Sýria og Eritrea.
Fólk í túsundatali eru eisini sjólátin í royndi at sleppa til Europa.