Kæra um prestainnstilling avgreidd í næstu viku

<p>Bergur Berg, fulltrúi í mentamálaráðnum sigur, at tey hava fingið fleiri upplýsingar í málinum, og tær eru sendar advokatinum hjá prestinum, sum hevur kært avgerðina um innstillingina. Advokaturin hevur freist til fríggjadagin at koma við viðmerkingum.</p>

<p>Bergur Berg sigur, at hevur advokaturin og sostatt kærarin einki at viðmerkja, verður málið helst avgreitt fyrst í næstu viku. Einum av umsøkjarum hevur kært innstillingina av Ova Brim sum prest, til Mentamálaráðið.</p>

<p>Advokaturin hjá kæraranum segði við Kringvarpið 3. desember, at innstillingin til prestastarvið eigur at ganga umaftur, tí fleiri í kirkjuráðnum eru ógegnig, og tað er í stríð við fyrisitingarlógina.</p>

<p><strong>Kærarin vísir á ivasom viðurskifti</strong></p>

<p>Í kæruni, sum Kringvarpið hevur fingið innlit í, vísir kærarin á fleiri ivasom viðurskifti. Eitt nú er deknurin í kirkjuni pápi Ova Brim. Formaðurin í Kirkjuráðnum er systkinabarn pápa Ova Brim, og annar deknur í kirkjuni er kona kirkjuráðsformannin.</p>

<p>Ein annar kirkjuráðslimur er beiggi konu formannin í Kirkjuráðnum. Kærarin vísir eisini á, at tættar relatiónir eru millum foreldrini at Ova Brim og kirkjuráðsformannin, sum eisini var orðførandi til setanarsamrøðurnar.</p>

<p>Kærarin heitir tí á Mentamálaráðið um at ógilda innstillingina av Ova Brim og ístaðin vísa hana aftur til nýggja viðgerð. Tað lá annars í kortinum, at Ovi Brim skuldi taka við sum prestur í sóknini, eftir at kirkjusóknirnar á Nesi og í Gøtu høvdu innstillað hann til kallið sum sóknarprestur.</p>

<p>Eftir ætlan skuldi prestvígsla og innsetan vera í desember. Tað&nbsp;varð kortini av ongum eftir at setanin varð kærd.</p>