Faroe Petroleum riggar av í Íslandi

Eftir at hava gjørt kanningar av ymsum slag í økinum, sum felagið fekk tillutað í seinastu útbjóðing, er felagið komið eftir, at einki er at fara eftir í loyvinum eystan fyri Ísland.

Nils Sørensen, stjóri, sigur við oljan.fo, at kanningarnar, sum felagið hevur gjørt av undirgrundini í loyvinum, vísa, at møguleikarnir fyri at olja ella gass kunnu vera tilstaðar, eru so gott sum ongir.

Hetta tí at loyvið liggur í einum jarðfrøðiligum øki, har olja ikki kann verða goymd, staðfesta kanningarnar. Við avgerðini at gevast við oljuleitingini í Íslandi, hevur Faroe Petroleum nú heilt slept Norðuratlantshavi.