Kanna møguleika fyri góðshavn á Sundi

<p>Til ber at fáa meira fyri minni á Sundi, halda tjóðveldisfólkini í Tórshavnar býráði, Jógvan Arge, Marin Katrina Frýdal og Jákup Dam. Tey skjóta upp at kanna&nbsp;um nýggja góðshavnin kann byggjast á Sundi, áðrenn hildið verður fram at fyrireika byggingina í Havn.</p>

<p>Tey vísa eisini á, at ikki er kannað yvirhøvur, um til ber at byggja góðshavn aðra staðni í Tórshavnar kommunu enn uttan fyri Skansan í Havn. Tjóðveldi hevur fingið gjørt eitt leysligt uppskot um góðshavn á Sundi.</p>

<p><strong>Málið verður viðgjørt hóskvøldið</strong></p>

<p>Sambært uppskotinum&nbsp;skal byggjast frá bryggjuni á Sundi eystur móti Kallanesi, tað er út eftir Kaldbaksfirði. Flokkurin sigur, at fyri 300-400 mió. kr. ber til at fáa úr 900 upp í 1400 metrar atløgubryggju í staðin fyri 700 metrar fyri 450 milliónir, sum eru tølini í ætlanini at útbyggja Skansabryggjuna.</p>

<p>Havnarbyggingarmálið verður viðgjørt í býráðnum í Havn í annaðkvøld. Meirilutin í býráðnum skjýtur upp, at býráðið alt fyri eitt samtykkir at taka undir við byggiskránni fyri at útbyggja Eystara havnarøki og Skansabryggjuna.</p>

<p>Samstundis mælir meirilutin til at játta seks millónir krónur til at projektera hesa ætlan.</p>