Grønlendski rækjustovnurin skal verjast

Til tess at verja rækjustovnin hava grønlendsku politikararnir avgjørt at lurta eftir lívfrøðingunum og lækkað rækjukvotuna, hóast helvtin av grønlendska fiskaútflutninginum er rækja.

Men niðurskurðurin rakar grønlendsk og donsk reiðarí í Grønlandi misjavnt.

Rækjukvotan hjá grønlendingum er minkað 14 prosent, men kvotan hjá danska reiðarínum Ocean Prawn er lækkað niður í helvt eftir fáum árum, skrivar danska kringvarpið.

Kristian Barslund Jensen, sum eigur Ocean Prawn, heldur seg vera fyri vanbýti.

- Eg skilji væl, at grønlendsku starvsfelagar okkara siga, at teir sjálvir eru førir fyri at fiska alla rækjuna einsamallir. Men hinvegin vóru vit við til at menna rækjufiskiskapin í Grønlandi, og vit fiskaðu rækju, áðrenn grønlendingar vistu, at tað bar til at fiska rækju, sigur hann. 

Men grønlendsku politikararnir hava avgjørt at umsita rækjukvoturnar soleiðis, tí teir eru noyddir at verja búskapin, sigur Rikke Becker Jacobsen, sum granskar í grønlendskari fiskivinnu á lærda háskúlanum í Aalborg. 

- 92 prosent av øllum grønlendska útflutninginum eru fiskavørur, og rækjur umboða helvtina av øllum útfluttum fiskavørum. Tí hevur rækja sera stóran týdning fyri grønlendska samfelagið, sigur hon.

Grønlendsk og donsk skip kunnu fiska tilsamans 73.000 tons av rækju í grønlendskum sjógvi um árið.