Skaðin mettur til 1,7 milliónir

Tað var 23. januar, at kjallarin í handilsskúlanum á Kambsdali stóð undir í vatni, tí ein á var lopin og rann inn í skúlan. Hjalmar Hansen, skúlastjóri, sigur, at 1,7 millión er leyslig meting.

Eitt nú skal streymurin leggjast av nýggjum, motorar og stýrisskipanin til útsúgvingina skulu skiftast, og motorur og annað til lyftina skal eisini skiftast.

SÍ EISINI Handilsskúlin á Kambsdali stóran vatnskaða

Enn vantar ein meting av, hvat skal gerast við eitt nú teldur og servarar, sum stóðu í kjallaranum. Tí er metingin ikki endalig.

Tryggingin kannar í løtuni skaðan, og tá hon er liðug við arbeiðið, ber til at fáa endaliga upphædd fyri, hvussu stórur skaðin er, sigur Hjalmar Hansen, skúlastjóri á handilsskúlanum á Kambsdali.