Føroyingar ikki í størri vanda at fáa sclerosu

Møguleikin fyri at fáa sclerosu, er ikki størri, ert tú føddur og uppvaksin í einum lítlum avbyrgdum samfelag, enn í einum størri samfelag.

Og tað sama er galdandi, hóast fólk, sum finna saman, eru tætt í ætt við hvørt annað.

Tað vísir ein nýggj kanning, sum er gjørd á Syddansk Universitet, og sum danska Sclerosufelagið hevur almannakunngjørt.

Føroyingar og sclerosa

29 føroyingar, sum hava sclerosu, eru kannaðir, og úrslitini eru samanborin við 28 fólk, sum ikki hava sclerosu.

- Í Føroyum eru møguleikarnir størri at fáa ávísar sjúkur, tí fólk, sum finna saman, ofta er í ætt við hvørt annað, sigur Stefanie Binzer, lækni á neurologisku deildini og phd-lesandi á Syddansk Universitet.

Hon hevur staðið á odda fyri kanningini, og hevur fingið vegleiðing frá Egon Stenager, sum er professari og leiðari á Sclerosuklinikkini í Suðurjútlandi.

Stefanie Binzer fór undir kanningina, tí ymsar genetiskar samansetingar kunnu økja um vandan fyri at fáa sclerosu. Tí er tað áhugavert at kanna fólkasløg, sum mestsum øll eru í ætt við hvørt annað, sigur hon.

Og fyrstu kanningarnar vísa, at tey, sum fáa sclerosu, ikki eru tættari í ætt við hvørt annað, enn tey, sum ikki fáa sclerosu.

Ikki neyðugt at stúra

- Tað er áhugavert fyri føroyingar og onnur fólkasløg, tí tey nýtast ikki at stúra fyri at vera í einum vandabólki, sigur Stefanie Binzer.

Ein partur av kanningini er at kanna genetisku samansetingarnar, og tað er Stefanie Binzer nú í ferð við at gera. Og tá tað arbeiðið er liðugt, verður tað eisini almannakunngjørt, skrivar danska Sclerosufelagið á heimasíðuni.