Andstøðan ikki fingið fundarboð

Andstøðuflokkarnir hava onga innbjóðing fingið um at koma til tingingar um nógv umrøddu fiskivinnunýskipanina.

Hvørki Høgni Hoydal, formaður í Tjóðveldi, ella Aksel V. Johannesen, formaður í Javnaðarflokkinum, hava fingið nakra innbjóðing frá samgonguni, søgdu teir fyri løtu síðani.

Tað var annars fríggjadagin, at landsstýrismaðurin í fiskivinnumálum, Jacob Vestergaard, bríkslaði til seinasta umfar í drúgvu tilgongdini at fáa eina nýskipan av fiskivinnuni.

Hann segði við útvarpið, at andstøðan í felag skuldi koma til tingingar í hesi vikuni.

14 dagar

- Eg havi ætlan um, at lógaruppskotið skal verða liðugt og sent til hoyringar um einar 14 dagar, segði Jacob Vestergaard fríggjadagin, og legði afturat, at Fiskimálaráðið longu er farið undir at orða uppskotið.

Men í gjár varð hendan deadline vrakað av Kaj Leo Holm Johannesen, løgmanni. Hann segði við útvarpið í gjárskvøldið, at andstøðan skal hava ein "fair" møguleika at koma til veruligar samráðingar, og at 14 dagar frá seinasta fríggjadegi er ov tepur freist.

Løgmaður legði afturat, at hann vil hava breiða semju um nýskipanina, og at tað merkir, at í øllum førum annar av stóru andstøðuflokkunum - altso annaðhvørt Javnaðarflokkurin ella Tjóðveldi - skulu vera við, umframt teir smáu flokkarnir.

Men enn hevur andstøðan ikki fingið fundarboð.