- Tíðindi, mentan og ítróttur
Lønardeildin hevur fund við fakfeløg um starv
![](https://kvf.fo/sites/default/files/styles/grein-ovasta-mynd/public/150777de754dc9e4187e57a1db19137b.png?itok=3j5gX80B)
Nær er talan um eitt starv, sum skal lýsast leys sambært almenna setanarpolitikkinum?
Tann spurningin fer Lønardeildin í Fíggjarmálaráðnum at viðgera á fundi við Búskapar- og løgfrøðingafelagið, Akademikarafelagið og Starvsmannafelagið í hesi vikuni.
Búskapar- og løgfrøðingafelagið sendi Lønardeildini nakrar spurningar um hetta, tá tað kom fram, at Gjaldstovan bjóðaði út eitt verkætlanarleiðarastarv á Keypsportalinum.
Búskapar- og løgfrøðingafelagið vil hava at vita, um útboðið hjá Gjaldstovuni samsvarar við almenna setanarpolitkkin.
Eisini Starvsmannafelagið hevur víst á, at starvið sum verkætlanarleiðari á Gjaldstovuni eigur at verða lýst leyst sambært almenna setanarpolitikkinum.
Óheppin orðing
Snorri Fjallsbak, stjóri á Lønardeildini í Fíggjarmálaráðnum, sigur, at tað er hesin spurningur, sum verður umrøddur á fundinum í hesi vikuni.
Jørgen Niclasen, landsstýrismaður í fíggjarmálum, ásannar í svari til Kristinu Háfoss, tingkvinnu, at tað er óheppið, at orðingarnar í útboðnum eru soleiðis, at talan tað sama kundi verið um eit leyst starv, tí talan er um um eina útbjóðing av eini konsulenttænastu.
Almenn størv skulu lýsast leys og fylgja almenna setanarpolitikkinum, sigur Jørgen Niclasen, landsstýrismaður.