Avtalur um bygnaðarliga skipan gjørdar

Stýrini fyri sjálvsognarstovnarnar, Tekniska Skúla í Tórshavn og Føroya Handilsskúla, taka undir við at avtaka sjálvsognarstovnarnar og skipa ein almennan skúladepil, boðar Mentamálaráðið frá í tíðindaskrivi.

Sambært lógaruppskoti, sum verður lagt fyri Løgtingið, er ætlanin at skipa depilsráð, sum gevur vinnuni ávirkan á yrkisfakligu útbúgvingarnar á skúladeplinum.

Søkt verður í næstum eftir depilsstjóra fyri Marknagilsdepilin, sum fer at umfata alt virksemið, sum er í Tekniska Skúla í Tórshavn, Føroya Handilsskúla í Tórshavn og Føroya Studentaskúla og HF-skeiði.

Avtalað er, hvussu sambandið verður millum verandi leiðslur og depilsstjóran inntil flutt verður inn í nýggja skúladepilin á sumri 2016.