Órímiligt at senda kommununum rokningina

Tað er órímiligt, at landið letur kommunurnar rokningina fyri røkt av eldri fólkum, sum liggja á sjúkrahúsi, tí einki røktarpláss er tøkt.

Tað sigur felagið TIGN, sum hart ímóti ætlanin hjá Karstenu Hansen, landsstýrismannin í heilsumálum.

Heilsumálaráðið arbeiðir í løtuni við einum lógaruppskoti, sum skal gera tað møguligt hjá landinum at senda kommununum rokningina fyri røkt av persónum, sum eru á sjúkrahúsi, tí pláss ikki er fyri teimum í eldrarøktini. 

Órímiligt

- Hetta er fullkomiliga órímiligt, tá hugsað verður um, at tað als ikki er nakað nýtt, at persónar liggja á sjúkrahúsi, tí teir ikki kunnu útskrivast. Hetta átti at verið ein partur av samráðingunum millum landið og kommununrar um yvirtøku av eldraøkinum, sigur felagið TIGN. 

Felagið heldur tað vera ábyrgdarleyst, at landið, nú minni enn tríggjar mánaðir eftir at kommunurnar yvirtóku røktina, vil hava kommunurnar at rinda rokningina. 

Megna ikki betri tilboð

TIGN heldur, at tað er einki, sum bendir á, at kommunurnar fara at megna eitt betri røktartilboð. Og tað ger ikki støðuna betri, at kommunurnar fáa fleiri uppgávur at umsita, uttan at neyðug játtan fylgir við, vísir felagið á.  

Men tað er fíggjarliga høpisleyst at røkta fólk á sjúkrahúsi, tí tað er nógv dýrari enn at røkta tey heima ella á røktarheimum. Støðan átti at verið loyst fyri langari tíð síðani, sigur felagið TIGN.