Løgmaður: Eitt heilsuverk við einum stjóra

Vit skulu hava eitt heilsuverk og eina leiðslu.

Tað segði løgmaður á kjakfundi hjá lokalfelagnum hjá Sambandsflokkinum í Suðurstreymoy, skrivar Sosialurin.

Tað merkir ikki, at nakað sjúkrahús skal niðurleggjast, men dupultfunksjónir skulu lúkast burtur, segði Kaj Leo Holm Johannesen á fundinum.

Haraftrat fer Sambandsflokkurin eisini at arbeiða fyri, at tað verður ein læknafaklig leiðsla, sum tekur avgerðir, og ikki politikarar, tí tað eru teir ikki førir fyri, segði løgmaður. 

Eymt mál

Tey trý sjúkrahúsini verða vanliga mett at vera eitt politiskt eymt mál, sum kann kosta atkvøður. Seinast, málið varð tikið upp politiskt, var John Johannessen landsstýrismaður í heilsumálum fyri Javnaðarflokkin í 2011. Hann byrjaði eina tilgongd, sum skuldi hava við sær, at tey trý sjúkrahúsini skuldu hava eina leiðslu.

Uppskotið varð klárt at bera í tingið, men so nærkaðist løgtingsval, og so broyttu politikarar støðu, tí lokalpolitikkur kom upp í málið, hevur John Johannessen áður greitt frá í útvarpinum.

John Johannessen varð ikki afturvaldur á løgtingsvalinum.