Vit keypa nógv meiri

Smásølan er vorðin størri í Føroyum. 

Umsetningurin í smásøluni vaks nógv frá seinasta ársfjórðingi í 2013 til seinasta ársfjórðing í fjør sæst í nýggju mvg-uppgerðini hjá Hagstovuni.Føroyingar keypa nógv meira í handlunum í Føroyum nú enn fyri einum góðum ári síðani.

Men kortini eru bara matvørur og alkoholfríar drekkavørur komnar upp á sama stig, sum tær vóru fyri fíggjarkreppuna í 2008.     

Vísitalið fyri umsetningin í vørubólkinum matur og drekka, roknað í ársins prísum, vaks góð átta prosentstig í fjør.

Í føstum prísum, tá prísvøkstur ikki er við, er hækkingin 6,7 prosentstig.

Matur og drekka kosta meiri

Tølini hjá Hagstovuni vísa, at prísir á matvørum og drekkivørum eru hækkaðir. 

Klæði og skógvar eru á sama stigi sum í 2012 og 2013. Og nógv skal seljast afturat fyri at koma á sama stig sum í 2008.

Í vørubólkinum búnýti og innbúgv hevur verið støðug framgongd síðani 2011, bæði í ársins prísum og føstum prísum.