Fáa kostráðgeving í læknaviðtaluni

Kliniskir dietistar fara nú at veita kostfakliga tænastu til fólk, sum hava diabetes, hjarta-æðrasjúku og krabbamein. Ávísir bólkar av børnum fáa eisini hesa tænastuna.

Klinisku dietistarnir starvast hjá Heilsutrygd, og teir fara at hava sítt dagliga yrki á læknaviðtalum kring landið, so tætt við borgaran sum til ber. 

Læknin kann ávísa fólk til dietist, um hann metir, at tað kann betra um heilsustøðuna. Tænastan er ókeypis fyri borgaran.

Fyrr hevur ikki borið til hjá kommunulækna at ávísa fólk beinleiðis til dietist.

Klinisku dietistarnir fara at virka um meginpartin av landinum, og hava viðtalur í Havn - á Tinghúsvegnum og í Miðlon - á Sandi, í Kollafirði, Miðvági, á Tvøroyri og í Vági. 

Í næstum verður søkt eftir dietisti til viðtalurnar í Runavík og í Klaksvík, upplýsir Heilsutrygd.