Grønland: 222 milliónir í halli í fjør

Tá grønlendska fíggjarlógin fyri í fjør varð samtykt, vísti hon 24 milliónir kr. í avlopi

Men nógv broyttist í 2014, og nú árið er gjørt upp, vísir roknskapurin 222 mlliónir kr. í halli.

Orsøkin er, at virksemið í Grønlandi var nógv minni í fjør, enn roknað var við, at tí sviku inntøkurnar frá skattum og avgjøldum. Bygt varð bert fyri slakar 400 milliónir kr., sum var helvtina minni enn árið fyri.

Hóast vanliga virksemið var lítið, so gekst væl hjá serliga rækjuvinnuni. Avgjøldini, sum landskassin fekk frá fiskivinnuni, settu met í fjør.

Av tí at virksemið var so lítið í Grønlandi í fjør, so var ein góð milliard kr. eftir í grunninum til bygging og umvæling, sigur grønlendski landsstýrismaðurin í fíggjarmálum, Andreas Uldum, við KNR.