Útflutningurin 180 mió. størri enn innflutningurin

Føroyar útfluttu fyri slakar 180 milliónir krónur meira enn innflutt varð fyri í fyrsta ársfjórðingi í ár, vísa hagtøl, sum Hagstovan hevur kunngjørt í vikuni.

Útflutt varð fyri eina milliard og 418 mió. kr., sum eru 12 prosent meira enn í fyrsta ársfjórðingi í fjør. 

Innflutt varð fyri eina milliard og 242 mió. kr., sum eru trý prosent minni enn í fjør. 

Botnfiskur og uppsjóvarfiskur gjørdu, at útflutningsvirðið vaks í ár. 

Útflutt er fyri næstan hundrað milliónir krónur meira av toski í ár enn í fjør. Og nógv meira makrelur er eisini seldur í ár. Samanumtikið er útflutt fyri 130 mió. kr. meira av uppsjóvarfiski í ár.

Men laksurin er minkaður nógv. Kanska er hetta tí, heldur Hagstovan, at nógv varð útflutt í seinasta ársfjórðingi í fjør, tí eftirspurningurin var stórur í Russlandi.