Onkologur á Landssjúkrahúsinum hvørja viku

Onkologur - krabbameinsfrøðingur - verður á Landssjúkrahúsinum hvørja viku eftir ætlan í heyst.

Tað upplýsir Karsten Hansen, landsstýrismaður, í svari til Jónu Mariusardóttir Mortensen, tingkvinnu, sum hevur spurt um eftirkanning fyri bróstkrabba.

Karsten Hansen sigur, at arbeitt hevur verið við at fáa krabbameinsfrøðingar á sjúkrahúsinum í Lund at koma oftari á Landssjúkrahúsið, og tað hevur eydnast eitt tíðarskeið í summar og heyst. 

Avtala við Ríkissjúkrahúsið

Landssjúkrahúsið hevur fyri stuttum fingið avtalu í lag við Ríkissjúkrahúsið á onkologiska økinum, og so skjótt hon er sett í verk - eftir ætlan í heyst - verða krabbameinsfrøðingar á Landssjúkrahúsinum hvørja viku.

Jóna Mariusardóttir Mortensen spurdi eisini, nær skipanin um eftirkanning av kvinnum, sum eru viðgjørdar fyri bróstkrabba, fer at virka aftur.

Karsten Hansen sigur, at Landssjúkrahúsið hevur lagt eina ætlan fyri sjúklingar, sum ikki høvdu fingið nýggja tíð, tá ein yvirlækni á Medisinska deplinum fór frá fyri aldur herfyri. 

Fáa innkalling

Tær, sum eru komnar stytst, hava fingið viðtalutíð fyrst, og tær, sum eru komnar til 6-9 ár uttan tekin um afturstig, og sambært serfrøðini kunnu bíða í ein til hálvan annan mánað, hava fingið fráboðan um tað, so tær ikki skulu kenna seg ótryggar um bíðitíðina.

Hesir sjúklingarnir fáa viðtalutíð um eftirkanning í næstum.