Almenn móttøka á føroysku sendistovuni í Moskva

Í dag verður skipað fyri móttøku í Moskva í sambandi við, at føroysk sendistova er latin upp í Russlandi. 

Tað er Løgmansskrivstovan, sum skipar fyri. 

Á móttøkuni vera Kaj Leo Holm Johannesen, løgmaður, Bjørn Kunoy, sendimaður Føroya í Russlandi, og umboð fyri almennu myndugleikarnar í Føroyum. 

Eisini vera fleiri føroyskar fyritøkur við. Tað er Vinnuhúsið, sum samskipar ferðina hjá føroysku vinnuni. 

Umboð fyri politisku myndugleikarnar í Russlandi, útlendsk sendifólk í Moskva og russiskir samstarvsfelagar hjá føroyskum fyritøkum eru eisini boðin við. 

Sendistovan Føroya í Moskva læt formliga upp tann 3. mars, og er týdningarmikil liður í at styrkja handilssambondini við Russland, sigur landsstýrið. 

Uppgávurnar hjá føroyska sendiharranum eru at unmboða áhugamálini hjá Føroya Landsstýri í Ruslandi, og at virka fyri betri handilsligum viðurskiftum og styrkja mentanarligu sambondini landanna millum. 

Á føroysku sendistovuni í Moskva starvast tvey fólk - sendiharrin og ein russiskur skrivari.