Fíntelja atkvøðurnar á fólkatingsvalinum

Í dag verða tær 23.576 atkvøðurnar, sum komu á fólkatingsvalinum í Føroyum fyri einari viku síðani, taldar umaftur.

Klokkan tíggju fara 25 fólk at telja á Parnassinum á Hotel Hafnia í Havn, har atkvøðurnar frá øllum 58 valstøðunum eru savnaðar.

Olaf á Stongunum, formaður í valnevndini, sigur, at vanliga plagar fínteljingin at taka 12-13 tímar.

Broytir ikki úrslitið

Fínteljingin er opin fyri almenninginum.

So langt er millum flokkarnar, at mett verður ikki, at fínteljingin kann broyta úrslitið av fólkatingsvalinum.

Tjóðveldi fekk 5.730 atkvøður, Javnaðarflokkurin 5.666 og Sambandsflokkurin 5.500 atkvøður á fólkatingsvalinum 18.juni.