Føroysk arbeiðsmegi skattað av landinum

4.000 krónur meira eftir, tá skatturin er goldin. Tað er munurin á einari mánaðarløn upp á 25.000 kr. í Føroyum og Noregi. Er lønin 33.333 kr. skal tann, sum arbeiðir í Føroyum, rinda 4.761 krónur meira í skatti og øðrum avgjøldum, hevur Arbeiðsgevarafelagið roknað út eftir skattalógunum, sum vóru í 2013.

Føroyingar, sum arbeiða í Noregi, rinda skatt har. Tí er neyðugt at lækka lønarskattin í Føroyum, sigur Føroya arbeiðsgevarafelag, tí annars kappast Føroyar ikki á jøvnum føti við Noreg um arbeiðsmegina. 

Føroya arbeiðsgevarafelag hevur sett ein arbeiðsbólk at gera uppskot um, hvussu føroyska skattaskipanin eigur at verða tillagað. Arbeiðið er komið væl áleiðis, og felagið roknar við, at frágreiðing verður løgd fram í næstum.