Løgtingsval: Kvinnur meira kritiskar enn menn

Kanningin hjá Spyr.fo sigur, at kvinnurnar meira enn menninir leita sær vitan um politikk í miðlunum. 

Kanska er ein orsøk, heldur Spyr.fo, at kvinnur eru forvitnari enn menn ella kanska, at tær eru meira kritiskar, tá ræður um politiskar boðskapir. 

Veljarar fara ikki fyrst á heimasíðurnar hjá flokkunum, tá leitað verður eftir boðskapinum hjá flokkinum. Tvørturímóti. 

Útvarp og Facebook eru stóru miðini, í øllum førum sambært einari kanning, sum Spyr.fo gjørdi hósdagin. 300 fólk í aldrinum 18 til 80 ár vórðu spurd, hvar tey halda seg fáa størstu vitanina um løgtingsvalið 1.september.

40 prosent søgdu útvarp, Kringvarpið ella Rás 2, og 37 prosent hava størst álit á Facebook, tá tey fyrireika seg til valdagin. 

20 prosent nevna tíðindaportalarnar in.fo og portal.fo og 20 prosent nevna sjónvarpið. 

Aftast í røðini eru heimasíður hjá flokkum og valevnum, níggju prosent og bløðini átta prosent.