Jørgen og Jenis vilja hava fullveldissamgongu

Fólkaflokkurin og Miðflokkurin vilja hava ein fullveldissamgongu, og teir hava boðið Høgna Hoydal, formanni í Tjóðveldi, at standa á odda fyri samráðingunum um at skipa samgongu.

Tað skilir Kringvarpið, nú floksformenninir hitta Jógvan á Lakjuni, løgtingsformann.

Ein fullveldissamgonga hevur 17 ella 19 tingsessir. Tað veldst um, hvussu nógvir flokkar verða við.

Fyri løtu síðani var Jørgen Niclasen, formaður  í Fólkaflokkinum, á fundi við løgtingsformannin, og hann vísti á Høgna Hoydal sum samráðingarleiðara. Jenis av Rana skal hvørja løtu hitta løgtingsformannin.

Men Høgni Hoydal tekur eftir øllum at døma ikki av, tí hann hevur víst á Aksel V. Johannesen sum samráðingarleiðara, og Aksel V. Johannesen hevur mælt løgtingsformanninum til, at tað verður formaðurin í Javnaðarflokkinum, sum verður samráðingarleiðari.

Kaj Leo Holm Johannesen, formaður í Sambandsflokkinum, er í løtuni á fundi við løgtingsformannin, og hann vísir á Aksel V. Johannesen sum samráðingarleiðara.