Sambandsflokkurin skal hava nýggjan formann

Vánaliga valúrslitið hjá Sambandsflokkinum fær nú avleiðingar fyri formannin, Kaj Leo Holm Johannesen.

Hann verður ikki longur formaður í flokkinum.

Á fundi hjá tingmanningini í gjár gjørdist greitt, at Kaj Leo Holm Johannesen ikki kann halda fram sum formaður. Tað vilja valdu tinglimirnir ikki.

Tað hevur leingi prutlað undir lokinum í flokkinum, og eftir at flokkurin hevði stóra afturgongd, og misti tríggjar tinglimir, krevja valdu tinglimirnir, at broyting kemur í, og at neyðugt er at fáa flokkin aftur á beint, sum onkur málber seg.

Eingin fæst at siga nakað ítøkiligt um ætlaninar í flokkinum, tí talan er um eitt innanhýsis mál, sum sagt verður.

Fundarboð í dag

Men mannagongdin er, at landsnevndin verður kallað saman til fundar. Tað verður gjørt alt fyri eitt, og sum útvarpið skilir, verða fundarboðini send út í dag.

Tá landsnevndin hevur havt fund, verður kallað saman til eyka landsfund, har nýggi formaðurin skal veljast.

Hvør verður nýggjur formaður í Sambandsflokkinum er kortini ikki greitt, tað er m.a. eitt av málunum sum landsnevndin skal taka støðu til.