Fleiri enn 20 vilja vera stjóri í Føroya Tele

Føroya Tele fekk nakrar og tjúgu umsóknir til starvið sum stjóri í samtakinum.

Ómar Svavarsson, nevndarformaður, sigur við Útvarpið, at allir umsøkjararnir eru føroyingar.

Nevndin viðger nú umsóknirnar, og kunngjørt verður fyri 1.november, hvør fær starvið, sigur Ómar Svavarsson.

Føroya Tele søkti tann 11.august eftir stjóra. Umsóknarfreistin var til 4.september.

Kristian til Grønlands

Føroya Tele skal hava nýggjan stjóra, tí Kristian Davidsen, sum hevur verið stjóri seinastu níggju árini, hevur fingið starv sum stjóri í Tele-Post í Grønlandi. 

Hann fer úr stjórastarvinum i Føroya Tele í seinasta lagi nýggjársaftan.

250 fólk arbeiða hjá Føroya Tele og dótturfeløgunum.

2014 var besta árið hjá Føroya Tele higartil, úrslitið var 58,3 milliónir kr. eftir skatt. Landið eigur partafelagið Føroya Tele.