Í rættin við brunatrygdini á flogvøllinum

Føroya rættur er biðin um at avgera, hvør eigur myndugleikan at góðkenna brunatrygdina í farstøðini á flogvøllinum, Brunaeftirlitið ella Sørvágs kommuna.

Sørvágs kommuna gav Vága floghavn loyvi at brúka farstøðina, hóast Brunaeftilitið ikki hevði góðkent hana.

Brunaeftirlitið hevur stevnt, tí sambært eftirlitinum varð farstøðin ólógliga tikin í brúk. 

Brunaeftirlitið heldur uppá, at tað er myndugleikin, sum skal góðkenna brunatrygdina í farstøðini. Og tað hevur Brunaeftirlitið ikki gjørt. 

Málið byrjar 3.juli í fjør, tá Sørvágs kommuna gav P/f Vága floghavn loyvi at brúka nýggju komu- og farstøðina. Brunaeftirlitið bað Sørvágs kommunu taka nýtsluloyvið aftur, tí Brunaeftirlitið hevði ikki góðkent bygningin.

Nýggj byggilóg

Brunaeftirlitið og Sørvágs kommuna eru ikki samd um, hvør hevur myndugleikan at góðkenna brunatrygdina í farstøðini. Sambært lóggávuni, sum var galdandi, tá farið varð undir byggingina, skal Brunaeftirlitið góðkenna. 

Men 1.apríl í 2013 kom nýggja byggilógin, og tá fingu kommunurnar hendan myndugleikan.Innlendismálaráðið segði tó í rundskrivi 27.mai í 2013, at Brunaumsjón landsins, sum stovnurin tá kallaðist, átti ítøkiligu brunamálsviðgerðina, tá talan var um "ikki vanliga" bygging, sum fekk byggiloyvi fyri 1.apríl 2013, tá nýggja lógin kom. 

Sørvágs kommuna gav byggiloyvið tann 27.september í 2012, tað er so fyri 1.apríl í 2013. 

Brunaeftirlitið og Sørvágs kommuna hava roynt at loyst málið, men higartil uttan úrslit. 

Í vár stevndi Brunaeftirlitið so Sørvágs kommunu og P/f Vága floghavn.