Seta ferðsluljós upp við tunlarnar

Seinni í ár verða ferðsluljós sett upp við tunlarnar Norður um Fjall. 

Tað boðar Landsverk frá.

Tað hevur javnan verið frammi, at trupulleikar hava verið við ferðslutøppum í tunlunum Norður um Fjall, og fólk kenna seg ótrygg. 

Við ferðsluljósunum vónar Landsverk, at ferðslutøpparnir fara at minka, ella at slepst heilt undan teimum. Ymsar kanningar og fyrireikingar skulu gerast, áðrenn ljósini verða sett upp. 

Ferðsluteljari

Landsverk fer at seta ferðsluteljara upp við tunlarnar fyri at kanna ferðsluna nærri og fáa til vega fleiri dátur.

Ætlanin er at seta upp sonevnda intelligenta ferðslustýring við ferðsluljósum upp á staðnum, sum skal stýra ferðsluni, serliga tungu ferðsluni.

Eisini verða rýmingarljós og eldsløkkjarar sett upp , umframt at tilbúgvingarætlan er gjørd fyri tunlarnar Norður um Fjall.