IS hevur tikið ábyrgdina av yvirgangsatsóknini

Fráboðanin er skrivað og lisin bæði á fronskum og arabiskum.

Fleiri forsætisráðharrar hava fordømt yvirgangsatsóknina og alment givið til kennar, at Frakland kann vænta sær stuðul. 

Undantaksstøða er lýst í Frakland í dag, eftir at 129 fólk vóru myrd av yvirgangsfólkum í einari skipaðari yvirgangsatsókn. 

Ósek vóru skotin á fimm ymiskum matstovum í franska høvuðsstaðnum. Meinast rakt var Bataclansentrið, har  fýra yvirgangsmenn drupu 80 fólk, sum vóru til rokkkonsert hjá amerikanska bólkinum Eagles Of Death Metal.

Tríggir yvirgangsmenn sprongdu seg sum skilst sjálvar í luftina í álopinum, og hin fjórði var skotin av fronsku løgregluni.

Átta yvirgangsmenn eru dripnir av fronsku løgregluni, men tað er enn ikki vist, um allir yvirgangsmenninir hava latið lív, ella um onkur er sloppin til rýmingar.

Sambært BBC eru 200 onnur særd. Og fyri løtu síðani bórust tíðindini um, at 99 av teimum særdu enn eru í lívsvanda. 

Atsóknin í Paris í gjár er tann næsta í Paris í ár og tann deyðiligasta yvirgangsatsóknin í Evropa síðani atsóknina í Madrid í 2004. 

- Tað, sum hendi í Paris í gjár og í Saint Denis, nærhendis leikvøllinum Stade de France, var ein krígsgerð og við tí í huga, mugu vit taka tær neyðugu avgerðirnar.

Jiahidistiski Yvirgangsfelagsskapurin Daesh, gjørdi hetta móti Fraklandi og móti teimum virðunum, sum vit verja allastaðni runt verðina, og ímóti tí, vit eru. Eitt frælst land, sum hevur týdning  í allari verðini. 

Hendan krígsgerðin var fyrireikað, skipað uttanifrá við hjálp frá fólki í Fraklandi. Hetta er ein fullkomiliga barbarisk gerð. Sum er nú hava 127 fólk latið lív. Segði Francois Hollande millum annað á tíðindafundi í morgun. Hann lýsti samstundis landasorg í Fraklandi í 3 dagar.