Ivi og veikleiki fara at eyðkenna heimsbúskapin

Ivi og veikleiki fara at eyðkenna búskapargongdina í heiminum í 2016.

Tey eru boðini frá stjóranum í Altjóða gjaldoyragrunninum, IMF, Christine Lagarde, nú um ársskiftið.

Útlitini í árunum, sum koma, eru heldur ikki so góð sum ynskiligt er, tí framleiðslan er lítil, fólk gerast eldri, og fíggjarkreppan gjørdi nógv um seg.

Tað er neyðugt, at amerikanski pengapolitikkurin kemur í eina trygga legu, og at gongdin í Kina um brúksvøkstur heldur fram. Men tað má gerast við skili, sigur stjórin í IMF.

Vandin er, at rentan í USA kann hækka meira, og tá Kina samstundis hevur afturgongd, kann tað gera heimsbúskapin sárbæran.

Vøksturin í altjóða handlinum er minkaður nógv, og prísurin á rávøru er lækkaður, sigur Lagarde.