Vilja royna ein dreingjaflokk

- Summir dreingir eru ógvuliga buldrutir og hava ilt við at savna seg um undirvísingina. Hóast teir eru gávaðir og hava gott arbeiðslag, hava teir ilt við at fáa tað burtur úr siðbundnu undirvísingini, sum teir kundu, sigur Don Joensen, skúlastjóri í Skála skúla, við Skúlablaðið.

Ætlanin er at hava dreingjaflokkin tvørtur um fleiri aldursstig. Undirvísingin skal vera øðrvísi og verður nógv uttandura og í náttúruni, har dentur verður lagdur á vísindaligu lærugreinarnar.

Nakrir dreingir fella uttanfyri

Næmingarnir hava kortini at varðveita tilknýtið til flokkin, tí dreingjaflokkurin verður bara ein partur av undirvísingini.

Don Joensen sigur við Skúlablaðið, at tað er at taka ov rívan til, at skúlin er ikki fyri dreingir, men hjá summum dreingjum er skúlin, sum hann vanliga verður skipaður, ikki nóg væl egnaður.

- Nógvir dreingir klára seg væl í skúlanum, men summir fella uttanfyri, og leggja vit undirvísingina til rættis eftir hesum dreingjum, so verða aðrir næmingar við sviðusoð, sigur hann.

Hava arbeitt við líknandi skipan

- Tí er ein loysn at gera eina roynd at skipa ein flokk við dreingjum, sigur Don Joensen við Skúlablaðið.

Skúlin á Skála hevur fyrr arbeitt við málrættaðari undirvísing til dreingir við góðum úrsliti, men nú er ætlanin at fara eitt stig longri.

- Lógir loyvir okkum at skipa ein dreingjaflokk, men neyðugt er at fáa tímar, tí verandi tímajáttan er so tepur, sigur Don Joensen, skúlastjóri á Skála.