Kommunan fær Handilsskúlan

Tórshavnar kommuna fær handilsskúlan í Marknagili og trý hús við skúlastovum, sum standa við Handilsskúlan. 

Mentamálaráðið fær tey 40 prosentini, sum Tórshavnar kommuna eigur í Læraraskúlanum, Venjingarskúlanum og vøllinum sunnan fyri skúlarnar. 

Harafturat fær Mentamálaráðið niðastu lonina í Venjingarskúlanum, lonina, sum er granni hjá Fimleikarhøllini. Hana eigur Tórshavnar kommuna nú alla sum hon er.

Og kommunan fær aftur stykkið, sum hon fyri einum mannaminni síðani ella so gav Fróðskaparsetrinum at byggja á. 

Stykkið er niðan fyri vallaraheimið Kerjalon við Hotel Føroyar.

Einmælt samtykt

Býráðið í Havn samtykti einmælt makaskiftið í gjárkvøldið.

Mentamálaráðið má leggja makaskiftið fyri løgtingið til góðkenningar.

Makaskiftið er gjørt í sambandi við, at Tórshavnar kommuna byggir skúlan á Fløtum. 

Samstundis gjørdu kommunan og Fróðskaparsetrið í november í fjør samstarvsavtalu um lestrarbýling, kampus, á Frælsinum og á Debesartrøð. 

Býráðið hevur ikki avgjørt enn, hvat kommunan skal brúka Handilsskúlan til. Men eitt boð er at brúka hann til Nám X.