Fáa bót á Tvøroyri

Oddur Dimon er settur sum aktingarmaður, og hann byrjar í starvinum í næstu viku.

Tá verður sostatt galdandi, at um leysgangandi djór eru til ampa fyri fólki, skal sigast frá á politistøðini á tlf. 35 14 48. 

Løgreglan setir seg síðan í samband við aktingarmannin, sum tekur upp djórið og setir tað í varðveitslu. 

Dýrt fyri eigaran

Er talan um ein hund, kostar tað 300 krónur bara fyri upptøku. Síðani skalt tú rinda 125 krónur um dagin, meðan hundurin er í varðveitslu hjá aktingarmanninum. 

Fyri kettur, kaninir, gæs, dunnur, høsn og onnur smádjór er upptøkugjaldið 125 krónur, og so 35 krónur fyri hvørt samdøgur.

Fyri seyð er upptøkugjaldið eisini 125 krónur, men tey fyrstu seks samdøgrini kostar tað 60 kronur um samdøgrið og síðani 35 krónur samdøgrið. 

Dýrast er hjá teimum, sum hava ross ella onnur stórdjór, sum aktingarmaðurin hevur tikið. Tað kostar 600 krónur í upptøkugjaldi, og so 125 krónur fyri fóður fyri hvørt samdøgur.

Pengarnar fyrst

Og djórið verður ikki latið eigaranum aftur, fyrr enn henda rokningin er goldin, stendur í avtaluni millum Tvøroyrar kommunu og Føroya Landfúta.

Løgreglan í Havn skal hava boð um leysgangandi djór, - tlf. 351448. Og aktingarskipanin virkar alt samdøgrið. 

Tú kanst lesa meira um aktingarmannin hjá Tvøroyrar kommuni á heimasíðuni tvk.fo.