Ólafur Ragnar Grímsson ivast

Summir eygleiðarar í Íslandi vænta, at hann longu í dag fer at boða frá, at hann tekur uppstillingina aftur.

Orsøkin er, at 68 ára gamli Davíð Oddsson, fyrrverandi forsætisráðharri, púra óvæntað kunngjørdi í gjár, at hann stillar upp. Harafturat hevur 47 ára gamli søgufrøðingurin Guðni Thorlacius Jóhannesson boðað frá, at hann stillar upp. 

Sambært veljarakanningum er hann væl dámdur og í prosentum beint aftan fyri Ólaf Ragnar Grímsson.  

Rúkandi ósamdir

Tá Davíð Oddsson stillaði upp, gjørdist greitt, at valstríðið verður politiskt og persónligt.

Davið Oddsson og Ólafur Ragnar Grímsson eru rúkandi ósamdir um politikk og vóru mangan í hørðum orðadrátti áðrenn Ólafur Ragnar gjørdist forseti, og ósemjan teirra millum steðgaði ikki, hóast annar gjørdist forseti. 

Fakta:

Ólafur Ragnar Grímsson, sum fyllir 73 leygardagin, hevur verið forseti í Íslandi síðani 1996. Í nýggjársrøðu sínari kunngjørdi hann, at hann stillaði ikki uppaftur.

Men 18.apríl boðaði hann frá, at hann stillar upp kortini. 

Orsøkin var, segði hann, støðan í íslendska politikkinum eftir at Panamaskjølini avdúkaðu, at millum annað forsætisráðharrin hevði átt pengar í skattaskjóli.  

Ólafur Ragnar Grímsson segði eisini, at fólk bóðu hann um at stilla uppaftur.

Evsta mark at stilla upp til forsetavalið er 21.mai.