Eingin í nevndini stillar uppaftur

Í kvøld verður aðalfundurin hjá Ítróttarsambandi Føroya, har nýggjur forseti og nevnd skulu veljast. 

Nógv rumbul hevur verið í ÍSF seinastu tíðina, tí ósemja hevur verið um, hvussu tær 11 milliónir krónunar, sum ítrótturin fær í stuðli frá landinum um árið, skal býtast millum sersambondini. 

16 sersambond eru undir ÍSF. Øðrumegin eru tey trý stóru sambondini, Flogbóltssambandið, Hondbólssambandið og Svimjisambandið, ið ikki vilja góðtaka nýggja býtið, at stuðulin skal býtast javnt millum øll. Tey trý sambondini vilja, at játtanin fylgir við, hvussu virkin sersambondini eru.

Hinumegin eru øll hini 13 sambondini, ið fegnast um, at tey fáa  fleiri pengar tillutaðar. 

Ósemjan hevur elvt til, at Petur Elias Petersen, ÍSF forseti, valdi at fara frá, umframt aðrir nevndarlimir í ÍSF.

Eingin stillar uppaftur

Sum skilst, stillar eingin í undanfarnu nevndini uppaftur. 

Hvør stillar upp, er ikki alment, men 13 av teimum 16 sersambondunum hava  sagt, at tey skjóta Elina Heðinsdóttir Joensen upp til nýggjan ÍSF-forseta. 

Hini trý sersambondini høvdu upprunaliga eitt mótvalevni, men sum skilst hava tey tikið sítt uppskot aftur, tí mett varð ikki, at nakar møguleiki var at fáa undirtøku fyri tí. 

Verður Elin Heðinsdóttir Joensen vald, verður hon fyrsti kvinnuligi forseti í ÍSF. 

Aðalfundurin hjá ÍSF verður í kvøld klokkan seks.