Ófriðarlig nátt í Havn

Í Tórsgøtu var hópbardagi millum 15 menn. Løgreglan var noydd at nýta piparsprey fyri at fáa menninar at skiljast.

Aðrir bardagar vóru eisini og einaferð í nátt varð løgreglan boðsend til eini privathús, tí pápi og sonur vóru farnir til hendurs. Avhoyringar eru í løtuni í tí málinum.

Fleiri klintraðu upp á tekjur

Tað vóru eisini fleiri, sum hildu tað vera skilagott at klintra upp á ymsar tekjur í býnum og sita har og lurta eftir tónleikinum.

Seks mans vóru farnir upp á takið á Sirkus, tveir mans vóru uppi á tinghústakinum, og ein maður var farin so høgt upp sum upp á takið á Hotel Tórshavn.

Fleiri hava eftir øllum at døma øtast við og lagt myndir á Facebook av manninum uppi á tekjuni. Maðurin á tekjuni á Hotel Tórshavn, tók eina selfie, áðrenn hann kom niður aftur.

Annars vóru nógv full fólk koyrd til hús, og ambulansan mátti eisini eftir einum persóni, ið var dottin.